ဘုရားအလောင်းတော် သုမေဓာရှင်ရသေ့ဘ၀မှာ သံသရာတစ်ဖက် ကမ်းကို တစ်ကိုယ်တည်း ကူးနိုင်စွမ်းရှိပါလျှက် အတ္တမဆန် မဟာကရုဏာ အကြံတော်ဖြစ်သည်မှာ...
“ငါဟာ အလိုတော်ရှိလျှင် ဒီနေ့ပင် သာဝကရဟန္တာဖြစ်နိုင်တယ်။ ဒီပင်္ကရာဘုရားရှင်ထံမှာ မထင်မရှားအသွင်နဲ့ လွတ်မြောက်မှုနိဗ္ဗာန်ကို မျက်မှောက်ပြုဖို့ အဘယ်မှာအကျိုးရှိအံ့နည်း။ ဘုရားဖြစ်အောင် အားထုတ်ပေအံ့...၊
သဒ္ဓါ၊ ပညာ၊ ၀ီရိယအားအစွမ်းရှိတဲ့ ယောင်္ကျားမြတ်ဖြစ်ပါလျှက် တစ်ကိုယ်တည်း သံသရာမှ ကူးမြောက်လို့ မည်သို့မျှ အကျိုးမရှိ။ ဘုရားဖြစ်အောင် အားထုတ်ပြီး သတ္တ၀ါအပေါင်းကို ကယ်တင်ပေအံ့...၊
မြင့်မြတ်တော်မူသောဒီပင်္ကရာဘုရားရှင်ထံမှာ အသက်ကိုရင်းကာ တံတားခင်းပြုအပ်တဲ့ အဓိကာရကောင်း မှုကြောင့် ကုယ်တိုင်ဘုရားဖြစ်ပြီးလျှင် သတ္တ၀ါအပေါင်းကို သံသရာဆင်းရဲမှ ထုတ်ဆယ်ကယ်တင်ပေ အံ့...။” ဟူ၍ ကြီးမြတ်တဲ့မဟာကရုဏာတော်ဖြင့် ဘုရားဆုပန်ကြွေးကြော်ခဲ့တာ ဟာ ဒီနေ့မဟာ ကဆုန် လပြည့်နေ့မှာ ဖြစ်ပါတယ်။
အလောင်းတော်သိဒ္ဓတ္ထမင်းသား ဖွားမြင်လို့ ခြေလှမ်းတော်ခုနှစ် ခုမြောက်မှာ ရဲရဲရင့်ရင့် ကျူးရင့်တော်မူ သည်မှာ..
“ငါဟာ လူသုံးပါးတွင် အမြတ်ဆုံးဖြစ်၏။”
“ငါဟာ လူသုံးပါးတွင် အကြီးအကဲဖြစ်၏။”
“ငါဟာ လူသုံးပါးတွင် အချီးမွမ်းအပ်ဆုံးသူဖြစ်၏။”
“အခု ပဋိသန္ဓေနေရခြင်းဟာ ငါ့အတွက်နောက်ဆုံးပဲ။”
“ယခုအခါ ငါ့အဖို့ရာ နောက်ဘ၀သစ်ဖြစ်ဖို့ဆိုတာ မရှိတော့။”
ဟု ဒီနေ့မဟာ ကဆုန်လပြည့်နေ့မှာ ရဲရင့်စွာကျူးးရင့်တော်မူခဲ့ပါတယ်။
ထို့အပြင် ဗောဓိပင်ရင်းမှာ ဘုရားစင်စစ်ဖြစ်တော်မူပြီးနောက် မနသာဥဒါန်းကျူးရင့်တော်မူသည်မှာ...
“ဘ၀ဖန်ဖန် ခန္ဓာဝဋ်မပြတ် ယောနိလေးထွေ ပဋိသန္ဓေဖြစ်ပွားရခြင်းဟာ ဆင်းရဲလှတယ်။ ဒါကြောင့် ငါဟာ ဘ၀များစွာသံသရာမှာ တဏှာလက်သမားကို ဖွေရှာလျှက် ဘုရားဖြစ်တဲ့အထိ သံသရာရဟတ် ကျင်လည် ကျက်စားခဲ့ရလေပြီ။ ဒီမှာ တဏှာလက်သမား..၊ ငါဟာ အခု ဘုရားအဖြစ်ရောက်လို့ မဂ်လေးတန်ပုဆိန်ဖြင့် သင့်ကို အမြစ်ပြတ် ခုတ်လိုက်ပြီးတဲ့အတွက် သင် ခန္ဓာအိမ်ထပ်မဆောက်နိုင်တော့ပါ။ သင့်ရဲ့ ကိလေသာ ဒိုင်းမြားတွေကို အငွေ့ပါမကျန် ဖျက်ဆီးလိုက်ပြီ။ အ၀ိဇ္ဇာအိမ်အထွတ်ကို မုန့်မုန့်ညက်ညက် ချေဖျက်အပ်ပြီ။ ကိလေသာကင်းစင် ငါ့စိတ်အစဉ်သည် နိဗ္ဗာန်ခွင်အအေးဓာတ်သို့ သက်ဝင်မိလေပြီ။ တဏှာကုန်ရာ အာသ ဝေက္ခယစတုတ္ထမက်ဖိုလ်သို့ ဆိုက်ရောက်ခဲ့လေပြီ။”ဟူ၍ အောင်လံတစ်ဆူ ကြွေးကြော်တော်မူခဲ့သည်မှာ လည်း ကဆုန်လပြည့်မဟာ ယနေ့အခါပင် ဖြစ်ပါတယ်။
ထို့နောက် ၄၅ ငါးဝါကာလတစ်လျှောက် တရားသောက်ရေ တိုက်ကျွေးခဲ့ပြီ့း နောက်ဆုံး အချိန် ညောင် စောင်းပလ္လင်မှာ ကြီးမြတ် တဲ့ကရုဏာဖြင့် နောက်ဆုံးမှာကြားကျူးရင့်တော်မူခဲ့သည်မှာ...
“ချစ်သားချစ်သမီးတို့..၊ ငါဘုရား နောက်ဆုံးမှားကြားလိုသည်မှာ.. သင်္ခါရတရားတို့ဟာ ဖြစ်တတ်ပျက် တဲ့တဲ့ သဘောရှိလေတယ်။ မမေ့မလျော့မပေါ့မဆ အပ္ပမာဒခေါ်ငြား သတိရားနဲ့သာ လက်ကိုင်ထား နေ့ရစ် ခဲ့ပေတော့...”ဟု နောက်ဆုံးစကား ၀င့်ကြွားဆုံးမတော်မူခဲ့သည်မှာ ကဆုန်လပြည့်အချိန်အခါပင် ဖြစ်ပါ တယ်။
ဒါကြောင့် ကဆုန်လပြည့်ဗုဒ္ဓနေ့ဟာ လူသားမဟာ ရှင်မြတ်စွာရဲ့ ရဲရဲတောက်ဥဒါန်းစကား ကြုံးဝါး တော်မူခဲ့တဲ့နေလို့ ပြောရင် မမှားပါဘူး။ ဗုဒ္ဓဘာသာဝင်သူတော်စင်များ ဗုဒ္ဓဘုရားရဲ့ ကြုံးဝါးသံ များဖြင့် ပြည့်လျှံနေတဲ့ ကဆုန်လပြည့်နေ့မှာ အနန္တကျေးဇူးရှင် ဘုရားရှင်ကိုယ်တော်မြတ်ရဲ့ မဟာကရုဏာ ဂုဏ်တော်ကို အာရုံပြုကြည်ညိုကာ ပူဇော်ကြခြင်းဖြစ်တယ်။
ဒါကြောင့် ဗုဒ္ဓနေ့မှာ ဗုဒ္ဓရဲ့အဆုံးအမသတိတရားတော်ကို လိုက်နာပွားများပြီး ခန္ဓာအလီလီ တည်ဆောက်နေတဲ့ တဏှာလက်သမားကို ပါးသထက်ပါးအောင် လှီးဖြတ်ကာ အငြိမ်းဓာတ်တည် ရာ မြတ်နိဗ္ဗာန်ကို ဆိုက်ဝင်ပျော်နိုင်ကြပါစေသတည်း....။
ရွှေစမ်းမြေ အရှင်က၀ိဓဇသာရ
No comments:
Post a Comment